LA UNION – Nakatuding a sumango ni Kingdom of Jesus Christ founder Apollo Quiboloy iti dua a nagsina nga arraignment wenno panangibasa ti darum inton Biyernes, Setyembre-13.
Agpada a nangipaulog ti Pasig City Regional Trial Court (RTC) Branch 159 ken Quezon City RTC Branch 106 ti nagsina nga order a mangibil-bilin iti Philippine National Police (PNP) nga idatag ni Quiboloy ken kakadwa na nga akusado iti korte iti kapada nga oras ken aldaw.
Idiay Pasig RTC naidatagan ni Quiboloy ti qualified trafficking in persons wenno panaglabsing iti Republic Act (RA) 9208, wenno mas am-ammo kas Anti-Trafficking in Persons Act of 2003.
Idiay met Quezon City RTC, sumangsango ni Quiboloy iti kaso a child abuse wenno panaglabsing iti RA 7610 wenno Special Protection of Children Against Abuse, Exploitation and Discrimination Act.
Iti kaso ni Quiboloy idiay QC RTC ket sigud a kaso a naidatag kenkuana idiay Davao City RTC ngem inyakar ti Supreme Court kasaruno ti apela ti DOJ.
Daytoy ti umuna a gundaway a ti ‘self appointed son of God’ ket mabasaan ti darum iti dua a nagsina a korte.
