Nasentensyaa a maibalud ti agingga innem a bulan ni Guia Cabactulan, maysa kadagiti administrator ti Kingdom of Jesus Christ (KOJC) sadiay Los Angeles Angeles California.
Kasaruno daitoy ti 7 counts ti immun-una a nangsagmak kenkuana nga adda pakainaigan na ti visa fraud. Ti panagkeddeng ket impaulog ni Judge Terry Hatter Junior ti US District Court, Central Distirct of California.
Imbilin na a maiturong ni Cabactulan iti kustodiya ti Bureau of Prisons tapno idiay na a gibusen ti innem a bulan a pannakabalud na ken mapasarunuan pay ti duwa a tawen a supervised release.
Maysa ni Cabactulan nga inarestar ti Federal Bureau of Investigation (FBI) idi tawen 2020 sadiay KOJC headquarters idiay Van Nuys, Los Angeles nu sadino kadwa na a nakemmeg ni Marissa Duenas.
Idi Oktubre napalabas a tawen idi nagpastrek ti plea agreements ni Cabactulan kadwa ni KOJC official Amanda Estopare sadiay US Attorney’s Office idiay California kalpasan nga aklonen ti pannakainaig iti visa fraud operations ti KOJC.
Ni Estopare ket inarestar metlaeng ti FBI idi 2020 idiay Virginia kadwa ni Maria De Leon a maysa nga travel agent a nagpeke kadagiti dokumento ti KOJC members tapno maaddaan iti legal status.
Manamnama iti panagkeddeng kenda Duenas ken De Leon kadagiti umaganad a bulan.
Maibasar iti korte manipud 2015 agingga Enero 29, 2020 idi nagkukunsabo da Estopare, Cabactulan ken dadduma pay a nangpeke ti kasar dagiti miembro da nga impatulod met ti founder da a ni Pastor Apollo Quiboloy.
