Imbilin ni Manila Archbishop Jose Cardinal Advincula ti panagkararag ti ‘Oratio Imperata para sa Bayan’ mangrugi iti maikatlo a lawas ti Quaresma a naisakto met ti Marso 22-23 ita a tawen.
Maibasar ti Circular No. 2025-19, panggep daitoy a magun-od ti kinakapia, hustisya, ken panagkaykaysa iti baetan ti kumarkaro a saan a panagkakainnawatan iti politika ditoy pagilian.
Nakalanad pay iti circular ni Cardinal Advincula a kasaruno dagiti pasamak kadagiti napalpalabas nga aldaw ket napartuat dagiti nagduduma nga opinyon manipud kadagiti nagduduma a plataporma.
Impaganetget na a ti intero a Pilipinas ket adda ita iti panawen iti krisis, panagaapa, ken pannakaulaw dagiti mapaspasamak.
Isu ket namaymayat kunana nga agkaykaysa lattan iti kararag – kangrunaan nga addang tapno magun-od ti kinakapia, hustisya, ken panagkaykaysa.
Mangnamnama ti Manila Archdiocese a babaen ti kararag ket dengnggen ti Apo ti kiddaw ti tunggal maysa ken paimbagenna ti arig na nagudwa-gudwan a pagilian.
