BR LA UNION – Eksakto alas 5:49 itay malem, Pebrero 5, nga inawat ni Senate Secretary General Renato Bantug manipud kenni House Secretary General Reginald Velasco iti kopya ti articles of impeachment kontra kenni Vice President Sara Duterte.
Daytoy ket kalpasan nga inyindurso dagiti 215 a miyembro ti Kamara iti impeachment complaint kontra kenni VP Sara.
Ti nasao nga addang ket dandani dua a bulan, sipud naidatag dagiti tallo nga impeachment complaints kontra kenni Duterte iti nababa a pagpandayan linteg ti Kongreso.
Iti interview, kinuna ni Senador Ronald “Bato” dela Rosa, a nalatak a kaalyado ni VP Sara, a ninamnama dan a mai-impeach iti bise idiay Kamara.
Impaganetget ti senador, a nakita na a talaga iti effort dagiti kongresista a patakyasen iti maikadwa a presidente.
Pa-angaw pay nga imbaga ni dela Rosa a saan a patas agsipudta dagiti adda idiay Kamara ket agkampanya dan idinto anga isuda idiay Senado ket kasapolan nga akmen ti pagrebbengan da kas Senator Judge.
Ni dela Rosa ket reelectionist iti kinasenador.
