Imbatad ti Department of the Interior and Local Government (DILG) nga agtaltalinaed latta ditoy pagilian ti negosyante a ni Atong Ang ken gistayan isunan a matiliw dagiti otoridad iti naisayangkat nga operasyon idi aldaw ti Huebes.
Segun kenni SILG Jonvic Remulla, adda ti naawat da nga “eyeball sighting” kenni Ang ngem naunaan da iti maysa nga aldaw isu a saan da daitoy a nadanunan. Nagkedked metten ti Sekretaryo nga ibutaktak ti eksakto a lokasyon.
Maikonkonektar ni Ang kadagiti kaso a kidnapping kadagiti mapukpukaw a mammallot ditoy Pilipinas idi tawen 2021 agingga 2022.
Sakbayna ket kummiddaw payen ti tulong dagiti otoridad sadiay Interpol para ti red notice kontra kenkuana bayat nga agtultuloy ti operasyon tapno mabirukan nu sadino iti pagduldulinan daitoy.
