LA UNION – Immalma ti maysa a babai a respondent wenno naidarum gapu iti reklamo a physical injury gapu iti panangiruar ti punong barangay iti Bucayab, Bauang, La Union iti certificate to file action para iti complainant.
Sigun kenni Ronalyn Tejano, ti ammona ket nalpasen ti reklamo a naidatag kontra kenkuana, ngem nakillaat daytoy gapu ta nangited iti certificate to file action ti konseho iti barangay para ti complainant.
Saan metten nga immatendar daytoy kadagiti naudi a hearing nga ipapaayab ti kapitan gapu ta ipagarupna a naibasuran ti nasao a kaso.
Kabayatanna, kinuna met ni Bucayab Barangay Chairman Joven Andrada, narisot koma iti reklamo a sangsanguen ni Ronalyn no nangipangag daytoy kadagiti subpoena nga ipatpatulodda kenkuana.
Aminado met ti kapitan a saan a dimmalan iti lupon tagapamayapa ti nasao a reklamo a naidatag iti barangay.
Ibabawi metten ni Kapitan Andrada ti intedna a certificate to file action iti complainant ken maminsan manen a paayabanna dagiti dua a desputants tapno tamingen manen ti kaso.
Kabayatanna, nangted met iti balakad ni Lupon Tagapamayapa Federation of San Fernando City President Oscar Halabaso a kasapulan a masurot iti proseso ti Katarungan Pambarangay tapno saan nga agbalin a dehado iti agsinnumbangir a benneg lalo iti panangited iti certificate to file action.
