LA UNION – Dead on arrival iti pagagasan ti maysa a 23-anyos a lalaki kalpasan a natnag iti kanal ti nagsakayanda a motorsiklo idi naidungpar dagitoy iti sarsarunuenda a van.
Nabigbig ti pimmusay a ni John Paul Sagun, residente ti Brgy. Sta. Cruz idiay ili ti Bacnotan.
Maibasar iti imbestigasion ti pulisia, naamuan nga agpada a dumaldalyasat iti national highway iti deppaar ti Brgy. Ili Norte, San Juan ti L-300 van a minaneho ni Joe Camaro, 34-anyos, bayat a sumarsaruno ti motorsiklo a minaneho ni Mac Kennel Vertiao.
Nupay kasta, kellaat a nagsikko nga agpakanigid ti van isu a saanen a nakontrol ni Vertiao ti manibela ti motorsiko a nagbanag iti pannakaidungparna iti lugan agingga a natnag dagitoy iti kanal.
Agpada a naitaray iti pagagasan dagiti biktima ngem pimmusay ni Sagun.
Agtultuloy ita nga im-imbestigaran dagiti otoridad ti insidente.
