BR LA UNION – Naan-anayen a naka-adayu iti teritoryo ti Pilipinas ti bagyo Paolo, nga addaan ti international name a MATMO.
Iti latest ken final bulletin ti PAGASA para iti Severe Tropical Storm PAOLO, naudi a nasaripatpatan iti kaadayu a 440 km laud ti Sinait, Ilocos Sur ken agpangpangta ita idiay Southern China.
Kabuyog ti angin a 110 km/h asideg iti sentro ken kapegges a dumanon iti 135 km/h.
Dup-dupagenna iti laud amianan-a-palaud ti kapartak a 20 km/h.
Saanen a maka-apektar ti bagyo Paolo ditoy pagilian ken naibabawi metten ti ballaag ti bagyo.
Nupay kasta, ti napigsa nga angin a kabuybuyog ti bagyo, a posible pay a pumigsa ken agsubli iti typhoon category ket mangigubway ti napipigsa ken dadakkel a dalluyon, manipud 2.0 agingga 3.0 partikular iti kabaybayan ti Ilocos Region, Batanes, Babuyan Islands, Zambales, Mainland Cagayan, Isabela, ken Bataan.
Iti sabali a bangir, alas 8:00 itay bigat, October 4, 2025, maysa a low pressure area (LPA) iti ruar ti Philippine Area of Responsibility (PAR) iti imon-monitor manen ti weather agency ken addaan ti nangato a posibilidad a mabukel kas bagyo iti sumaganad a 24 nga oras.
Naudi a nasaripatpatan iti kaadayu a 2,300 km amianan, amianan-a-daya ti Extreme Northern Luzon.
Posible a ma-develop kas bagyo iti sumaganad a 24 nga oras wenno inton bigat, Oktubre 5, 2025.
