Posible a sumrek ti Tropical Storm “Hagupit” iti Philippine Area of Responsibility (PAR) ita a weekend ken maawagan ti “Caloy” apaman a sumrek iti pagilian, segun ti PAGASA.
Iti weather advisory itay bigat, kenuna ti ahensia a naudi a nasaripatpatan iti sentro ti bagyo iti kaadayo a 1,615 kilometro iti daya ti Northeastern Mindanao.
Kabuyogna iti angin nga agingga 75 kilometro tunggal oras asideg ti tengnga ken kapegges nga agingga 90 kph bayat nga aggargaraw pa-laud iti kapaspas a 20 kph.
Segun ti PAGASA, agtultuloy iti panagtignay ti “Hagupit” nga agpalaud sakbay nga ad-adda nga agturong iti laud-amianan a laud.
Manamnama a sumrek daytoy iti PAR inton rabii ti Sabado agingga agsapa ti Domingo.
Posible met a pumigsa ti “Hagupit” ken agbalin nga high-end tropical storm iti uneg ti sumaruno a 48 nga oras sakbay a kumapsut ken agbalin a tropical depression inton Martes bayat ti kaaddana iti Philippine Sea.
Nupay kasta, bassit laeng iti posibilidad a direkta nga apektaran ti bagyo iti panawen ken kasasaad ti taaw ti pagilian iti sumaruno a tallo nga aldaw.
Kabayatanna, banbantayan met ti PAGASA ti low pressure area (LPA) a nasaripatpatan iti 120 kilometro abagatan a daya ti Hinatuan, Surigao del Sur.
Nupay bassit iti tsansa ti LPA nga agbalin a bagyo, manamnama a mangyeg daytoy ti naulep a tangatang, mawaras-waras a panagtudo, ken panaggurruod idiay Central Visayas, Eastern Visayas, Negros Island Region, Caraga, Northern Mindanao, Davao Region, ken Zamboanga Peninsula.
Mapadasan met ti Metro Manila ken dadduma pay a paset ti pagilian ti apagapaman agingga nalulem a tangatang nga addaan ti mapatto-pattok a panagarbis ken panagguruod gapu ti Easterlies.###
