LA UNION – Arestado iti tallo a drug personalities kasaruno ti inwayat a search warrant operation dagiti otoridad iti maysa a balay nga inaramid a drug den ti suspek idiay Barangay Raois, Bacnotan, La Union.
Maiyannurot iti search warrant nga inyisyu ni Judge Victor Concepcion ti Regional Trial Court, First Judicial Region, Branch 66, City of San Fernando, La Union sinukimat iti nagtipon a puwersa ti Philippine Drug Enforcement Agency (PDEA) ken Philippine National Police (PNP) iti balay ti managan Marc Glen Sauro alyas Marlou Sauro iti nasao a lugar.
Binigbig ni PDEA RO 1 Regional Director, Director III Joel B Plaza, dagiti suspek nga isuda Marc Glen Buton Sauro, 39 years old, jobless, drug den maintainer; Ismael Oliveros Sauro Jr., 63, Barangay Tanod, drug den employee; ken Francis Florenia, 25, drug den visitor, a naarestar agarop alas 6:00 ti bigat idi Lunes, Oktubre 14, 2024.
Kas resulta iti operasyon, nakakumpiskar dagiti otoridad iti; 12 pidaso ti heat-sealed transparent plastic sachet a naglaon ti maipagarop a shabu, mapatta-patta nga agdagsen ti 30 grams ken agbalor ti P150,000.00; maysa pidaso ti heat-sealed transparent plastic sachet a naglaon ti suspected dried marijuana leaves, mapatta-patta nga agdagsen ti maysa gramp, agbalor ti P1,500.00; dua pidaso ti heat-sealed transparent plastic sachet a naglaon ti suspected marijuana seeds, mapatta-patta nga agdagsen ti more or less dua grama, mapatta-patta nga agbalor ti P500.00, sumagmamano a drug paraphernalia, maysa a black pouch, improvised cylinder burner, ken identification card.
Dagiti suspek ket sumangsango iti kaso a panaglabsing iti Section 6 (Maintenance of a Drug Den), Section 7 (Drug Den Employee and Visitor), Section 11 (Possession of Dangerous Drugs), and Section 12 (Possession of Drug Paraphernalia), Article II iti RA 9165 wenno mas am-ammo a Comprehensive Dangerous Drugs Act of 2002.
Dagiti suspek ket nakabalud iti PDEA RO I detention facility idiay Camp Diego Silang, Carlatan, San Fernando City, La Union.
