LA UNION – Maysa itan kadagiti daydaywen dagiti deboto Katoliko ti “Balikbayan Bell” wenno ti San Pedro bell a masarakan iti Sts. Peter and Paul Parish idiay ili ti Bauang, La Union.
Segun ken ni Mayor Clarence Martin de Guzman, sipud idi naipaima iti parokya ti nadakamat a kampana ket nairaman metten daytoy kadagiti religious artifacts a mabalin nga imatangan dagiti deboto.
Maipalagip a bulan ti Mayo idi napalabas a tawen a naisubli iti nasao a simbaan ti San Pedro Bell kalpasan ti panagtalinaedna idiay Amerika iti uneg ti maysa a siglo.
Naamuan nga aksidente daytoy a naala dagiti Amerikano a soldado idi maikadua a gubat-sangalubongan ken sipud idin, nagtalinaeden iti simbaan idiay West Point, New York.
