LA UNION – Imbilin ti National People’s Coalition (NPC) nga ikkaten ni suspended Bamban, Tarlac Mayor Alice Guo, manipud iti listaan dagiti miyembro gapu iti akusasyon a karaman iti ilegal a Philippine offshore gaming operator (Pogo) hub iti nasao nga ili.
Iti surat a napetsaan ti Hunyo 22, imbilin ni NPC chairman ken sigud a Senate President Vicente “Tito” Sotto III nga ikkatenen ni Guo kalpasan a nakaawat ti petisyon manipud kenni Tarlac Gov. Susan Yap idi Hunyo 17.
Iti surat na, imbaga ni Yap a saan a makaipaay ni Guo ti compelling evidence a mangpaneknek nga awan kinapudno na dagiti maiyak-akusar kenkuana.
Immunan a sinuspinde ti Office of the Ombudsman ni Guo matapos gapu iti reklamo nga indatag ti Department of Interior and Local Government (DILG).
Malaksid dayta, nangipila pay iti Philippine National Police – Criminal Investigation and Detection Group ken iti Presidential Anti-Organized Crime Commission iti kaso a qualified human trafficking kontra kenni Guo gapu iti alegasyon a konektado iti labor trafficking iti aganay 500 a gangannaet a Pogo workers.
