BR LA UNION – Barado a kanal iti kangrunaan a problema ti konseho iti Barangay Tanqui nu tiyempo ti panagtutudo.
Iti pannakiuman ti Bombo Radyo kenni Barangay Chairman Ernesto A. Aprecio Jr. ti Barangay Tanqui, City of San Fernando, La Union kinuna na a napartak iti pannaka-urnong ti danum ti tudo, nga isuti mangparnuay ti layos, gaputa barado ti drainage canal ken saan a maka-ayos a nasayaat ti danum ti tudo.
Partikular a dinakamat na iti District 3 ken tanqui lubong, a masansan a malayos.
Nupay kasta, dagus met a makiko-koordinar ni Kapitan Aprecio iti Department of Public Works and Highways(DPWH) ken iti City Disaster Risk Reduction and Management Council tapno masungbatan ti nasao a problema.
Binalakadan pay ni Kapitan Aprecio dagiti kalugaran na iti Barangay Tanqui, a nu makita nga agpeligro ti sitwasyon gapu kadagiti mapas-pasaran a panagtudo, mabalin da nga ipatungpal ti pre-emptive evacuation agsipudta nakalukat met a kanayon ti barangay hall kas evacuation center, para kadagiti maapektaran ti kalamidad.
