BR LA UNION – Dakkel ti perdisyon iti benneg ti agrikultura ditoy probinsiya ti La Union nga umaboten ti nasurok P54-M iti dandani makalawas a panagtudo na ti napigsa gapwanan ti napalabas a dua a bagyo ken habagat.
Daytoy ti kinumpirma ni John Martin, Public Information Officer ti Provincial Government of La Union,maibasar iti initial assessment report a naawat ti Provincial Disaster Risk Reduction and Management Office (PDRRMO).
Nupay maibilang kunana a blessing ti panagtudtudo na, nangigubway met daytoy ti problema kalpasan a nadadael iti sumagmamano a kita ti mula dagiti mannalon gaputi dandani makalawas a tuloy-tuloy a panagtudo.
Segun kenni Martin, dagiti high value crops ditoy probinsiya iti kangrunaan a naapektaran ken kadakkelan ti perdisyon, gaputi epekto ti dakes a panawen.
Kabayatanna, umabot iti nasurok 205 a ribu a pisos iti pukaw wenno lugi dagiti mannalon nga agtartaraken ti dingwen, a kas ti baka, nuang ken kalding, gaputi pannakaiyanod ken natay gapwanan ti hypothermia.
Impasigurado ni Martin a maipaayan ti tulong dagiti apektado a sektor, partikular dagiti mannalon, babaen iti naduma-duma a social ken financial assistance programs.
Umabot met iti 3.5 milyon ti nadadael iti benneg ti imprastruktura, maibasar iti inisyal a report.
Impanakkel pay ni Martin dagiti baro ken kumpleto nga rescue assets ti probinsiya a mausar iti panawen ti kalamidad partikular nu tiyempo ti panagtutudo ken uray ti naduma-duma a municipal disaster risk reduction and management office ket equipped ti rescue assets.
Innayon pay ni Martin a nakaibunong da metten iti 4,394 nga Agkaysa Family Food Packs kas tulong ken suporta para kadagiti ili a naapektaran ti kalamidad.
Namnamaen a manayunan pay ti balor ti agriculture loss ditoy probinsiya bayat nga agtultuloy ti panagawat ti PDRRMO ti report manipud iti naduma-duma a municipal agriculture office ditoy probinsiya ti La Union.
