LA UNION – Isagsaganan ti pulisya ti kaso a frustrated murder kontra ti maysa a lalaki a nangbagsol iti barangay kagawad a naganawan kabayatan iti panangparnuay daytoy iti riribok iti birthday party idiay Barangay Almeida, ili ti Balaoan, La Union.
Nabigbig ti suspek a ni Ronaldo Lozada, residente ti nasao a lugar.
Naammuan ti Bombo Radyo manipud iti Balaoan Police Station, kabayatan nga adda iti kangitingitan iti panagragragsak ti kasangay ket maipagarup a nagpagongga ti suspek gapu ta nabartek daytoy.
Inanawa met isuna ti biktima a ni Almeida Barangay Kagawad Nerio Magsino, ngem killaat a binagsolna babaen ti maysa a natirad a banag ti nasao nga opisyal ti barangay.
Dagus a naiturong iti ospital ti barangay kagawad kalpasan a naglak-am daytoy iti sugat ti barukong ken ulo tapno maagasan.
Agtaltalinaed met iti pagbaludan nga adda iti sidong ti pulisya ti suspek kabayatan a maur-uray ti resolusyon ti piskalya para iti pagbanagan ti kasao daytoy. (Absalom Flores)
