LA UNION – Umaapela ni Kapitan Felix Ganaden kadagiti motorista ti pannakaawat iti sitwasyon dagiti mannalon nga agibilbilag kadagiti mais iti kalsada a masakupan ti Barangay Nagsaag, ili ti San Juan, La Union.
Kinuna ni Kapitan Ganaden, saan met nga agnanayon nga adda iti naiwaris a mais iti kalsada ken apaman a mabilag a naimbag dagitoy ket idulin metten dagiti mannalon.
Sigun ti opisyal, saan a maakumudar ti barangay auditorium dagiti mais a maibilag isu a kadagiti kalsadan nga imbundaris dagitoy dagiti mannalon tapno saan a malungtot dagiti produktoda.
Iti nasao a barangay, innayon ni Ganaden, kakatlo iti papulasyon sadiay ket depdepende ti pagbiaganda babaen ti panagmula iti mais.
Immuna iti daytoy, nagbalin a mapagsasaritaan iti social media ti impost a ladawan ti Facebook account ti San Juan Police Station nga agpanawagan ken mangbabbalaw kadagiti nangibilag ti mais iti nasao a kalsada. (Absalom Flores)
