LA UNION – Natayen idi a maisangpet idiay ospital ti 15-anyos a barito a maipagarup nga aksidente a matagbat ti tengngedna babaen ti espada nga iggem ti kaay-ayamna idiay Barangay Cabaruan, ili ti Sto. Tomas, La Union idi rabii.
Nabigbig ti biktima a ni Al James Estacio, estuyanten ti Cabaruan Integrated School, ken residente ti nasao a lugar.
Naammuan ti Bombo Radyo manipud iti Sto. Tomas Police Station, sakbay ti nasao nga insidente ket maipagarup a naragsak nga aglanglangay ti biktima ken ti 15-anyos met laeng a kaay-ayamna nga ikotda ti espada idiay lugarda.
Impaiggem ti biktima iti kaay-ayamna ti espada a nakakaluban.
Idi nga inwasiwas iti kaay-ayam iti sango ti biktima ti espada ket naikkat ti kaluban daytoy ken saanna a naigagara a natagbat ti tengngedna.
Saannen a naisalbar ti doktor manipud iti pannakatay ti biktima gapu iti kinaadu ti dara a napukaw manipud iti bagina.
Naiturong met idiay kwerpo ti pulisya ti kaay-ayam ti biktima kabayatan a maur-uray iti agbalin a sungbat ti Department of Social Welfare and Development (DSWD) gapu iti napasamak. (Absalom Flores)
