BR LA UNION – Baro a dakes a panawen ti nasaripatpatan iti daya a paset ti Pilipinas ken namnamaen a sumrek iti Philippine Area of Responsibility (PAR) iti sumaganad nga aldaw.
Apaman a sumrek iti PAR, maawagan a Bagyo Uwan, ti maika-21 a tropical cyclone ita a tawen.
Segun kenni weather specialist Grace Castañeda, mabalin nga iti maudi a paset ti lawas a makaapekto ditoy pagilian ti nasao a weather disturbance.
Posible a tumama daytoy iti Luzon ken iti dadduma pay a paset ti pagilian, depende iti agbalin a garaw iti sumarsaruno nga aldaw.
Iti agdama, agtaltalinaed iti ruar ti PAR, ngem agtultuloy a bantayan dagiti eksperto.
Dua agingga iti lima pay a bagyo ti manamnama a sumrek iti PAR sakbay nga agtapos ti 2025.
Agtultuloy ti panangipalagip dagiti otoridad kadagiti tattao nga agbalin nga alerto ken nakasagana kadagiti posible nga epekto dagiti dakes a a paniempo.
