BR LA UNION – Pagtigtignayen ti grupo dagiti mangngalap iti baro a mangidadaulo ti Bureau of Fisheries and Aquatic Resources (BFAR) a ni Director Elizer Salilig a depensaan ti karbengan dagiti babassit a mangngalap iti municipal waters.
Kasaruno daytoy ti kontrobersiyal a desisyon ti korte a mangipalpalubos iti commercial fishing vessels nga ag-operate iti uneg ti 15 a kilometro iti municipal fishing zone.
Inaramid ti progresibo a grupo a Pambansang Lakas ng Kilusang Mamamalakayaa ng Pilipinas (Pamalakaya) iti nasao a karit iti BFAR chief tapno itakderan dagitoy kontra iti desisyon ti korte ken ipatungpal dagiti addang a mangted ti proteksiyon kadagiti municipal fishers.
Segun kenni Pamalakaya Vice Chairperson Ronnel Arambulo, iti uneg ti nasurok 3 a dekada a kapadasan ni Director Salilig iti sektor ti pagkalapan, rumbeng nga ammo na iti pas-pasaren a rigat dagiti babassit a mangngalap, nangruna nu maipapan iti kontrol ti monopolyo iti dadackel a negosyo iti communal fishing grounds ken marine resources.
Imbaga ni Arambulo a kayat da a siguradwen ni Salilig nga agtalinaed nga off-limits iti 15 kilometer municipal fishing zone manipud kadagiti dadackel a commercial fishing vessels.
Nadutukan ni Salilig kas BFAR director idi Enero 15 ken opisyal a nag-assume iti pwesto idi Enero 24 agdama a tawen.
