BR LA UNION – Dimmur-as iti apit a bangus idiay Bacnotan, La Union kumpara idi napalabas a tawen.
Daytoy ket laksid ti nagduduma a karit a sangsangwen dagiti bangus growers idiay Brgy. Baroro, Bacnotan, a kas ti pabaliw-baliw a panawen.
Segun kenni Jessie Cabagbag, Association President Baroro Fisher Folks and Farmers, napinpintas ti apit a bangus nu ikumpara idi napalabas a tawen, agsipudta basbassit ti mortality dagiti fingerlings, babaen ti naannad a panagpili iti paggatangan dagiti dekalidad a fingerlings ken feeds.
Kinuna na a napateg iti panagipakan ti nasayaat a kalidad ti feeds ken umno a lugar a pagtaraknan ti bangus tapno nasaysayaat ti panagdakkel dagitoy.
Maysa kadagiti agtaltalinaed a problema da ket ti pabaliw-baliw a tiyempo, a mangapektar ti panagdakkel dagiti bangus.
Nupay kasta, dakkel ti panagyaman ni Cabagbag iti lokal a gobyerno, iti BFAR ken DENR gapu iti agtultuloy a suporta kadakuada, kas iti technical support, logistics support, trainings, a makatulong iti asosasyon.
