BR LA UNION – Indaulwan ni La Union Governor Mario Eduardo C. Ortega iti inagurasyon ti baro a maipasdek a multi-purpose covered court nga agserbi kas evacuation center idiay Barangay Mindoro, Bangar, La Union.
Naamwan a madanon laeng ti nasao a barangay babaen ti panagusar ti balsa.
Nairanta ti nasao a proyekto tapno maipaayan ti usaren a natalged ken napateg a pasilidad dagiti umili nangruna nu panawen ti emerhensiya.
Segun ken Governor Ortega, ti covered court ket agbalin a natalged a pagkamangan dagiti residente, nangruna no adda kalamidad ken panaglayos.
Malaksid dayta, mausar pay daytoy a venue iti naduma-duma nga aktibidad wenno programa para kadagiti residente.
Kabayatanna, impasigurado ti Provincial Government of La Union nga agtultuloy iti panangipatungpal dagiti proyekto imprastrukura nangruna kadagiti adayo ken saan nga accessible a lugar ditoy probinsiya ti La Union.
