BR LA UNION – Kas panangtaming kadagiti pakaseknan ti narugit a danum iti lugar a kangrunaan a pagpas-pasayaran dagiti turista ditoy probinsiya ti La Union, nagtinnulong ti Provincial Government of La Union (PGLU) ken LGU-San Juan a nangibangon ti Septage Treatment Plant (STP), a pormal a nainagunaran idi Enero 24, 2025, idiay Brangay Sinapangan, San Juan, La Union.
Indauluan da Gov. Raphaelle Veronica “Rafy” Ortega-David ken San Juan Mayor Arturo P. Valdriz ti nasao nga aktibidad, kadwada dagiti lokal nga opisyal ken mangibagbagi iti nadumaduma nga opisina ken organisasyon ti gobierno.
Panggep ti pasilidad a pasayaaten ti pannakamanehar ti narugit a danum, maiyannurot iti Republic Act 9275 wenno Philippine Clean Water Act of 2004.
Ti ili a San Juan, a nalatak kas “Surfing Capital of the North,” ket day-daywen ti adu a bisita ken turista, nga isu met ti makagapo iti ngumatngato a wastewater production.
Tapno mataming daytoy, nagtinnulong ti PGLU ti munisipyo ti San Juan iti panangisayangkat ti feasibility study ket naibangon ti pasilidad, idinto nga inted ti munisipyo ti lote para iti nasao a proyekto.
Ti Septage Treatment Plant ket mangtaming ken mangsolbar kadagiti narugit a danum manipud kadagiti babbalay ken pasdek negosyo, a mangipasigurado iti natalged a panakaiturong iti water bodies kas koma iti irigasyon a mabalin a pagsibog kadagiti mula.
Impaganetget ni Gov. Rafy ti kinapateg ti proyekto iti pannakasustiner ti nadalus nga aglawlaw para iti pannakasalaknib ti salun-at ti publiko.
