LA UNION – Isagsaganan ti pulisya ti kaso kontra iti maysa a baro a maipagarup nga aglaklako iti shabu idiay Barangay Catbangen, syudad ti San Fernando, La Union.
Nabigbig ti suspek a ni Jerson Barselon, 18, residente ti Barangay Cabaroan, syudad ti San Fernando.
Naammuan ti Bombo Radyo manipud iti San Fernando City Police, naala manipud iti ikot ti suspek ti dua a sachet a naglaon iti maatap a shabu a saan pay a nadetermina iti balorna, karaman ti P500 a buy-bust money.
Kaddua met ti pulisya iti naaramid nga operasyon dagiti kameng ti Philippine Drug Enforcement Agency.
Kaso a panaglabsing iti Comprehensive on Dangerous Drugs Act wenno Republic Act 9165 ti maidatag a reklano kontra ti nadakamat a baro.
