LA UNION – Tiniliw dagiti pulis ti maysa a 20-anyos a baro a nagaramat iti ectoparasiticide wenno ti agas a pangpaksiat ti ampas iti aso idiay karayan ti Barangay Lectac Norte, ili ti Santol, La Union.
Naammuan ti Bombo Radyo manipud ti Santol Police Station, nasangpetan iti nagresponde a pulis ti baro a makumikom iti panagkalap babaen ti panangibukbokna iti nasao nga agas nga isu ti makagapu no apay a timpaw dagiti lames iti karayan.
Kinumpiskar met ti pulisya ti naduma-duma a kita iti lames a nakalap ti suspek.
Rinuk-atan met iti pulisya ti baro kalpasan a nagbayad daytoy iti multa nga umabot ti P2,500 gapu iti panaglabsing ti Anti-Water Pollution Ordinance ti ili.
Ti ectoparasiticide ket maysa a kita iti agas a maar-aramat laeng para ti aso tapno mapaksiat ti ampas wenno timel ken dadduma pay a klase ti parasite a nakakapet iti bagi daytoy. (Absalom Flores)
