LA UNION – Naiturong iti ospital ti 19-anyos a baro kalpasan a naglak-am daytoy iti sugat gapu iti panangtagbat kenkuana iti ama ti ar-armenna idiay ili ti Caba, La Union idi kalman, kabayatan a maramrambakan ti Valentine’s Day.
Naammuan ti Bombo Radyo manipud iti Caba Police Station, maipagarup a nagturong idiay balay iti balasang ti saanen a nainaganan a baro ken estudyante tapno agarem.
Maipagarup a saan a nagustuan iti ama ti balasang iti panangsarungkar ken panagarem ti biktima agingga a nagsipnget ti panagkita daytoy kasaruno ti pannagbat.
Maysa a natadem a buneng ti maipagarup nga inaramat ti tatang iti pannagbat iti kannigid nga ima ti agar-aramen.
Dagus a naglibas iti ama ti balasang ken maipagarup a tugotna ti nasao a buneng kalpasan ti insidente.
Ur-urayen met ti pulisya iti desisyon ti biktima no mangidatag daytoy iti kaso kontra ti ama ti ar-armenna a balasang. (Absalom Flores)
