Binalakadan ni House Speaker Ferdinand Martin Romualdez dagiti baro nga abogado a salaknibanda ti karbengan dagiti tattao, itandudo ti hustisia, tumulong a mangpadur-as iti pagilian ken agserbi a buyogen ti integridad ken pannakaseknan.
Daytoy ti mensahe ni Romualdez, agraman ti nabara a panangkablaawna kadagiti baro nga abogado a nakapasa iti Bar Exam.
Segun kenni Romualdez, saan laeng a dagiti nalaing nga abogado ti kasapulan ti pagilian no di pay ket dagiti tattao nga addaan prinsipio ken napigsa ti tarigagayda nga agserbi iti umili.
Mangnamnama ni Romualdez a ti karera dagiti baro a nakapasa iti Bar ket saan laeng a mangyeg iti dayaw iti pamilia ken propesionda no di pay ket agraman iti pagilian a Pilipinas.
