LA UNION – Nakabalud ita ti maysa a bartender kalpasan a tiliwen daytoy iti pulis gapu iti panagikotna iti marijuana idiay parking lot ti maysa a resort idiay Barangay Urbiztondo, ili ti San Juan, La Union.
Nabigbig ti suspek a ni Christian Jay Morales, 27, residente ti Barangay Ili Norte ti nasao nga ili.
Naammuan ti Bombo Radyo manipud iti San Juan Police Station, maipagarup a nakaawatda iti awag manipud ti nasao a lugar nga adda ti maang-angotda nga ayamuom ti marijuana nga agtataud iti nakaparada a traysikel idiay arubayan ti resort.
Iti panagreponde dagiti pulis, maipagarup a naaktuanda ti suspek idiay traysikelna nga agik-ikot daytoy iti marijuana.
Kaso a panaglabsing ti Sec. 11 ti Art II iti Republic Act 9165 wenno Comprehensive on Dangerous Drugs Act ti naidatag a reklamo kontra ti suspek.
