LA UNION – Gudwa iti reaksyon dagiti umili iti panangirwar ti Bangko Sentral ng Pilipinas (BSP) kadagiti baro a kuwarta, a pakaitampokan dagiti ayop nga endemic ditoy Pilipinas.
Naiduma daytoy kadagiti immun-una a klase ti kuwarta, a ti nakaikabil ket rupa dagiti banwar wenno popular a tao ti pagilian.
Iti salodsod ti Bombo Radyo, babaen ti Official Facebook Page, nu anya ti makuna dagiti iti baro a polymer bank notes, ket adtoy ti sumagmamano a kapanunutan:
Para kenni Bayani Abarientos, kinuna na a pabor iti baro a langa ti kuwarta, gaputa panawenen tapno bigbigen iti Ina nga Aglawlaw a nagtaudan ken pagturongan
Para kenni Ylil Nermal Carreon, pabor iti baro a bank notes agsipudta saan a nalaka a mapeke dagiti kuwarta, ken napinpintas nu ayup ti nakaikabil, imbes a dagiti banwar, gaputa adda kunana dagiti saan a mabigbigbig a banwar para iti dadduma
Simple met iti nagbalin a sungbat ni John Michael Estrella Tan, a kunana ket napintas iti baro a bank notes
Ngem para kenni Edgar Furatero, iti panagsukat ti klase ti kuwarta ket gastos manen. Kinuna na, nga idi koma inaramid ti napalabas a version ket daytoyen ti naipatungpal tapno saan a paulit-ulit ken saan manen nga aggastos dagiti umili
Para kenni Lauf Teddy, inaramid koma a mas bab-babassit dagiti bills.
Iti biang ni Mathew Del Valle, saan a pabor agsipudta malipatan laeng dagiti banwar a nangibuwis ti biag. Kinuna na a mabalin met a papintasen ti kuwarta a saanen a kasapolan nga ikkaten ti rupa dagiti banwar.
Kiniddaw na pay nga isubli dagiti kuwarta a papel a P5, P10 ken P20.
Agingga ita ket adu pay laeng ti agbiddut wenno matikaw da iti sinsilyo a P1, P5 ken P10.
Immunan a dinillaw ti historian a ni Prof. Xiao Chua iti saan a pannakairaman dagiti banwar kadagiti baro a polymer bank notes, nga arigna maysa a pananglipat.
