LA UNION – Nalawag nga adda ti panaglabsing dagiti dua a pulis a naglugan kadagiti motorsiklo ng awanan ti suot a helmet a naalaan iti ladawan a nag-viral iti social media idiay ili ti Bauang, La Union.
Daytoy iti kinuna ni Land Transportation Office-1 administrative officer Charlie del Rosario kalpasan a maammuanna ti nasao a viral photo.
Sigun kenni del Rosario a nakalanad iti linteg a masapul nga amin nga agsakay ti motorsiklo ket nasken nga agsuot iti helmet.
Saan met mabalin nga irason sigun ti opisyal dagiti nasao a pulis a dagiti nadakamat a lugan ket nakompiskar ken kasapulan nga i-impound isu a dagitoyen ti nagmaneho gapu ta saan a mabalin a sakayan dagiti natiliwan a naglabsing iti linteg-trapiko.
Innayon pay ni del Rosario nga addan iti biang ti Bauang Police Station no sampaanda ti kaso nga administratibo dagiti pulis nga awanan ti helmet lalo ta nagbalin pay a trending topice daytoy iti social media.
Immuna iti daytoy, immapela kadagiti umili ni Chief Inspector Joel Lagto, agdama a hepe ti pulisiya idiay Bauang, La Union a saan a manghusgar wenno mangipaay iti darasudos a komento, nu saan nga ammo iti pudno a pasamak wenno sitwasyon.
Inaramid ni Lagto iti nasao nga apela kabayatan iti eksklusibo a pannaki-innuman ti Bombo Radyo, kasaruno iti naawat a negatibo a komento iti dua a tauhanna a nagmaneho ti motorisklo nga awanan ti suot a helmet.
Nag-viral iti social media a Facebook iti ladawan dagiti dua a uniformed police personnel a nagmaneho ti dua a motorsiklo nga awanan ti suot a helmet iti national highway a masakopan ti nasao nga ili.
Ngem impaganetget ni Lagto, nga immaneho laeng dagiti pulis dagiti nasao a motorsiklo tapno ma-impound idiay Bauang police station, kalpasan a na-intercept dagitoy iti checkpoint gaputi panaglabsing iti linteg dagiti nagmaneho. (Absalom Flores)
