LA UNION – Nagkiddaw iti pannakawat ken dispensar ti Municipal Disaster Risk Reduction and Management Office (MDRRMO) ti Bauang, La Union kalpasan a nakawat dagitoy ti adu a pammabalaw manipud iti netizens idi a nag-viral ti social media ti maysa a video maipapan ti inaramidda a rescue operation ti nagbalin a biktima iti pammaltog ti riding in tandem idiay Barangay Calumbaya ti nasao nga ili.
Iti pannakiuman ti Bombo Radyo kenni MDRRMO Officer Joel Caniezo, kinunana a naiparna laeng a naisar-ong idiay crime scene dagiti tauhanna a naggapu idiay Barangay Bagbag a nangiganwat iti incident breifing para ti simultaneous earthquake drill.
Dagusda nga impaayan ti first aid ti biktima iti shooting incident nga adda iti uneg ti maysa a trak kabayatan a maur-uray a sumangpet ti agresponde nga ambulansya.
Inlawlawag ni Caniezo, umano laeng iti inaramid dagiti tauhanna nga ipaayan ti first aid ti biktima gapu ta daytoy a talaga ti protocol kabayatan a saan pay a simmangpet ti ambulansya wenno sakbay nga itaray iti ospital.
Sigun pay ti opisyal, daytoy ti umuna a gundaway nga adda ti tinulongan wenno napasaran nga i-rescue ti MDRRMO gapu ta kaaddua a main-engkwentroda ket dagiti nabiktima ti aksidente ken kalamidad.
Aminado met ni Caniezo nga adda iti nagkurangan iti tauhanna maipapan ti panangipaay ti first aid, ngem inaramidda met iti amin a kabaelanda tapno isalakan ti biktima.
Inlawlawagna a ti trabahoda ket mangipaay ti basic life support kas first aider.
No pay kasta, daytoy met kinunana ti agbalin a dalan tapno agpaisidongda iti sabali pay a training maipapan ti panangipaay ti first aid iti biktima ti pammaltog wenno kadagiti makuna a kritikal a pasamak.
Immuna iti daytoy, nag-viral iti video nga in-upload ti managan Jerald Rimando iti bukodna a Facebook account, ken umabot itan iti nasurok a 42,000 views ken 500 shares.
Immani iti adu a pammabalaw manipud kadagiti netizens ti MDRRMO kalpasan a nabuyada ti nasao a video.
(Link ti video na nag-viral: https://www.facebook.com/jerald.rimando/videos/2061590327450127/)
