Impakaammo ti Bureau of Fire Protection (BFP) iti publiko kontra iti panagusar iti paputok, nangruna kadagiti sangakabbalayan, lima laeng nga aldaw sakbay ti isasangpet ti tawen 2025.
Daytoy ket kalpasan a nakairekord ti ahensia iti dagup a 800 nga insidente ti uram ita a Disiembre, kaaduanna ket kadagiti residential areas.
Segun kenni BFP-Public Information Service chief Annalee Atienza, daytoy met ti standing order ti Department of the Interior and Local Government (DILG).
Mainaig iti daytoy, maidagadag kadagiti lokal a gobierno ti panangipasa da iti ordinansa a naan-anay a mangiparit iti panagusar iti paputok iti uneg dagiti sangakabbalayan.
Imbes ketdi, agbuya laengen kadagiti lugar a naituding a pakaangayan ti fireworks display nu ayan dagiti piesta ken countdown para ti baro a tawen.
Mainaig iti daytoy, indagadag pay ti opisyal ti BFP iti publiko nga agusar iti alternatibo a pampangiwat tapno maliklikan ti aksidente kas iti torotot ken videoke.
Kabayatanna, agtalinaed a nangato ti red alert wenno full alert status iti intero a hanay ti BFP agingga kalpasan ti baro a tawen wenno agingga iti Enero 2, 2025.
