Pinasingkedan ti Bureau of Immigration (BI) nga addaan dan ti impormasyon mainaig iti posible nga ayan ti sigud a Presidential Spokesperson Harry Roque, ngem nagkedked metten a mangipaay ti kanayunan a detalye ti ahensya.
Kinuna ni BI Spokesperson Dana Sandoval a saanda pay a mabalin nga ibutaktak ti impormasyon iti agdama.
Innayon na pay a dagiti updates ket maibinglay laeng kadagiti intelligence counterpart da ken ti pormal a waragawag ket mairuar tu metlaeng iti publiko iti umno nga panawen.
Impaganetget pay ni Presidential Anti-Organized Crime Commission (PAOCC) Director Winston Casio nga agdaman a maas-asikaso ti maysa a kaso nga adda pakainaigan ti Philippine Offshore Gaming Operator (POGO) nga maikokonektar ti nagan ni Roque.
Segun kenni Casio, maysa a petisyon ti forfeiture ti naipila kontra ti Lucky South 99 a nakaisagmakan da Cassandra Li Ong ken Roque nga agpada a nakapaisidong ti preliminary investigation.
Kabayatanna, agtultuloy met ti PAOCC kadagiti kaso kontra ti ilegal nga operasyon ti POGO, nu sadino 12 a kason ti naipila ti korte, walo kadagitoy ti adaan iti preliminary investigation, ken 13 ti adda ti preparatory stage.
Karaman kadagiti kangrunaan a kaso nga maidurduron ket ti civil ken criminal forfeiture kontra iti Baofu wenno Zun Yuan Technology nga adda pakainaigan na kenni Alice Guo a pagaammo pay kas Guo Hua Ping, kasta met ti naipila a kaso kontra ti SA Rivendell, Sun Valley Corporation, ken Smart Web Technology.
