Dakkel ti epekto iti panagbiahe dagiti provincial buses ti pannakasuspindir ti kanayunana a plete nga inwaragawag ni Presidente Ferdinand Marcos Junior.
Kinuna ni Provincial Bus Operators Association Executive Director Alex Yague, adu a kompanya ti agsardeng ti operasyon da agsipud ta saan dan a mabaelan iti sustento ti langis, gapo ta agkurang tu metten iti matgedan.
Innayon pay ni Yague nga ur-urayen da lattan ti written order manipud Department of Transportation (DOTr) ken Land Transportation Franchising and Regulatory Board (LTFRB) para kadagiti sumaruno nga addang ti grupo.
Nupay kasta, awan metlaeng iti maaramidan da nu di ket tungpalen nu ania iti maipaulog a pammilin.
Nagpanawagan iti asosasyon iti kongkreto nga addang manipud gobierno a marikna dagiti adda iti sektor ti transportasyon ken saan laeng a band-aid solutions.
Maipalagip nga adda metten dagiti paayuda, ngem immun-una a naikkan ket dagiti tricycle drivers ken operators idiay National Capital Region.
