Agdagupen iti 638 ti bilang dagiti aksidente iti kalsada kabayatan ti panawen ti bakasion kalpasan a nainayon ti 32 a baro a kaso idi Sabado, Enero 4, 2025.
Immadu daytoy iti 30% manipud kadagiti nairekord nga Road Traffic Incidents idi 2023.
Maibasar iti datos ti Department of Health (DOH), manipud iti dagup a kaso, kaaduan kadagitoy, wenno 553 kadagiti naaksidente ti saan a nagusar iti safety gears kas iti helmet ken seatbelt, ti maikadua a rason ti aksidente ket gapu iti motorsiklo a 452 ti kaso idinto a 117 iti aksidente ket nakainum ti arak.
Agtaltalinaed a pito ti bilang dagiti natay a nairekord ti DOH, ken uppat kadagitoy ket gapu iti aksidente iti motorsiklo.
Gapu iti umad-adu a bilang dagiti nairekord nga aksidente iti kalsada, impalagip manen ti ahensia ita a ngudo ti lawas a saan nga agmaneho iti sidong ti impluensia ti arak, agusar iti safety gears, agsuro iti disiplina iti kalsada ken agtulnog kadagiti linteg ti trapiko ken road signs.
