Immadu pay ti bilang dagiti indibidual a naipadamag a pimmusay idiay Bicol Region kalpasan a napadasan ti nakaro nga epekto ti Severe Tropical Storm Kristine.
Maibasar iti datos nga inruar ti Police Regional Office V, 26 nga indibidual ti naireport a pimmusay bayat nga agtultuloy paylaeng ti pannakaberipika dagiti otoridad.
Malaksid iti daytoy, umabot iti tallo ti agtaltalinaed a mapukpukaw idinto a siam a tattao ti nairekord a nadundunor.
Gapu iti layus a pinarnuay ti Bagyo Kristine, 314,309 nga indibidual, katupag ti 106,303 a pamilia ti agtaltalinaed kadagiti evacuation areas.
Iti agdama, 586 a barangay idiay Bicol ti nailumlom pay laeng iti layus idinto a kaaduan kadagitoy ket taga probinsia ti Camarines Sur.
Agtultuloy ti rescue operation dagiti maseknan nga ahensia kadagiti na trap pay laeng a pamilia iti nangato a danum ti layus.
Idiay Naga City, personal nga indauluan ni sigud a Bise Presidente Leni Robredo ti pannakaiwaras ti tulong kadagiti naapektaran nga umili ken bimmaba pay iti layus kaduana ti Angay Buhay team-na.
Ti donasion a naawat ti Kaya Natin Movement for Good Governance and Ethical Leadership ket dimmanon iti nasurok a 13.4 a milion sipud pay idi insayangkat daitoy ti sigud a bise president.
