Dumanon ti 1,143 a pamilia iti naapektaran iti panagbettak ti Bulkang Mayon wenno katupag ti 4,139 nga indibidual manipud kadagiti 13 a barangay, maibasar iti monitoring ti Department of Social Welfare and Development (DSWD).
Segun ti ahensia, pakabuklan a 1,128 a pamilia iti agtaltalinaed kadagiti naluktan nga evacuation center ken 15 met dagiti temporario a nakinaed kadagiti kabagian wenno kadagiti am-ammoda.
Nakaipaay metten iti ahensia ti nasurok ₱6 million a gatad ti tulong bayat a nasurok a ₱3.1 billion dagiti relief supplies iti agtaltalinaed nga available para kadagiti biktima ti didigra.
Iti laksid ti agtultuloy a panag-alboroto ti bulkang Mayon, awan pay ti nailista a pagtaengan a nadadael.
Agtultuloy iti panagsagana ti DSWD para iti posibilidad ti panagngato ti bilang dagiti apektado ken maibakuit a pamilia.###
