LA UNION – Umaboten ti 81 a tattao iti naipadamag a natay iti panagduprak ti Severe Tropical Storm Kristine nga addaan ti international name a Trami ditoy Pilipinas.
Daytoy ti inwaragawag ti Office of Civil Defense (OCD) ita nga aldaw ti Sabado, Oktubre 26, kabayatan ti news forum idiay Quezon City.
Segun kenni OCD Administrator and Undersecretary Ariel Nepomuceno, iti nasao a bilang ket subject iti validation ken verification.
Maibasar iti datus nga inruar ti Office of Civil Defense, iti bilang dagiti atay ket manipud CALABARZON – 48; sumaruno iti Bicol Region (Region V) – 28 ti natay; dua idiay Cordillera Autonomous Region, maysa iti Ilocos Region (Region I), ken maysa met idiay Zamboanga Peninsula Region (Region IX).
Kinuna pay ni Nepomuceno, nga adda ti 66 a tattao a nadundunor ken 34 pay iti mapukpukaw.
Kabayatanna, impadamag met ti National Disaster Risk Reduction and Management Council (NDRRMC) nga adda pakabuklan a 547 a nalayos a lugar manipud iti Regions I, II, III, CALABARZON, MIMAROPA, V, VI, VIII, IX, XIII, CARAGA, BARMM, ken National Capital Region.
Pakabuklan a 4.472 million nga indibiduwal wenno 1.062 million a pamilya iti nakaru a naapektaran iti panagduprak ti bagyo kristine.
Pakabuklan metten nga 83 a siyudad ken munisipalidad ti naipasidong iti under state of calamity gaputi bagyo Kristine a pakaibilangan ti napakarwan a probinsiya ti Batangas.
