Imbilin ti Bureau of Internal Revenue (BIR) iti panangisyu ti Letters of Authority (LOAs) tapno mangisayangkat ti tax audits kenni Bise Presidente Sara Z. Duterte, iti asawana a ni Manases R. Carpio, ken siam a negosyo a konektado iti mag-asawa.
Segun ti BIR, daytoy nga addang ket bunga ti nainget a panagammiris nga adda ti probable cause tapno mangisayangkat ti pormal nga audit investigation kadagiti nadakamat a taxpayers.
Dagiti revenue officers a maidutok iti tunggal kaso ket maipaayan ti bileg a sukimaten dagiti libro ti accounts ken dadduma pay nga accounting records dagiti subject entities.
Maibasar iti BIR, ti pammilin para iti LOAs ket nakailanad iti third-party information, karaman dagiti datos datos manipud kadagiti public ken official sources, maitunos iti Section 5 ti National Internal Revenue Code (NIRC).
Ikonkonsidera met ti Bureau iti testimonya manipud ti Office of the Ombudsman mainaig ti Statements of Assets, Liabilities, and Net Worth (SALNs) ni VP Duterte, karaman dagiti reports manipud ti Anti-Money Laundering Council (AMLC) a nairuar iti impeachment proceedings ti House of Representatives kontra iti Bise Presidente.
Dagiti negosyo a maipasidong ti audit:
- Carpio Lawyers (sigud a Carpio & Duterte Lawyers)
- Zelta Matiem Salon
- City Hall King Chow Foods Corporation
- Davao Bounty Times Foods Corporation
- Madayaw Fisheries Inc.
- Davao Emerging Taipans Corporation
- Amianan Shores, Inc.
- Cale88 Foods Corporation
- Geometry Security and Investigation Agency, Inc.
