BR LA UNION – Nasukimat iti insayangkat a panagdengngeg ti House Tri-Committee ti isyu iti tax compliance dagiti social media influencers.
Sinalodsod ti maysa kadagiti chairman ti komite a ni Antipolo City Rep. Romeo Acop iti nangibagi ti Bureau of Internal Revenue (BIR) a ni Atty. Ron Mikhail Uy nu nakapag-comply ti bureau iti direktiba ti Tri-Comm idi napalabas a hearing seknan iti panangisumite ti bilang dagiti social media influencers a pinatawan ti tax ti BIR ken iti baybayadan da a buwis.
Inlawlawag met ni Atty. Uy a nangbukel ti BIR ti maysa nga specialized body wenno task force a mangtutok iti imbestigasyon dagiti social media influencres nga idi aganay ket naiyiswan dagitoy ti letters of authority para iti kanayunan a tax audit.
Kinuna na a nangipaay ti komite iti bureau ti listaan ti nagan dagiti 27 a social media personalities ket nakita a kaadwan kadakuada ket rehistrado.
Ngem inaklon ti BIR official a gaputa us-usaren dagiti social media influencers ti nagan da ken awan iti kompaniya, sumagmamano kadakuada ket kapad-pada ti nagan ti dadduma a taxpayers, ket maysa kadagitoy iti 17 agingga 18 nga addaan ti kapad-pada a nagan.
Sinalodsod ni Cong. Acop iti BIR official nu kaatnu a maisumite iti listaan ti nagan dagiti social media influencers, ngem impaganetget ni Atty. Uy nga iti sidong ti Tax Code, saan a mabalin nga idisclose dagiti sensitibo nga impormayon partikular iti detalye iti tax payments.
Kabayatanna, idi salodsoden ni House Deputy Speaker David Suarez iti BIR official nu agbaybayad ti buwis dagiti social media platforms ditoy pagilian, sungbat ni Atty. Uy a rumbeng nga agbayad ti buwis dagitoy iti mapas-pastrekan da ditoy pagilian kas non-resident foreign corporations dagitoy.
Idi masalodsod pay ti BIR official nu agbaybayad ti nasao a socmed platforms, sungbat ni Atty. Uy nga iberipika da daytoy ken nagkari nga isumite na iti sumaruno a lawas.
Binabalaw met ni Cong. Suarez iti maysa kadagiti influencers ken content creators a ni sigud a Press Sec. Trixie Cruz Angeles nu agbaybayad da ti buwis iti panag-vlog dagitoy.
