BR LA UNION – Nangidatag ti Bureau of Internal Revenue ti baro a kaso a ‘tax evasion’ idiay Department of Justice kontra iti maysa a kontraktor a karaman iti anomalya dagiti flood control projects.
Personal a simmangpet iti departamento ni Internal Revenue Comm. Charlito Martin Mendoza tapno mangipila ti reklamo kontra iti akinkukua ti Wawao Builders a ni Mark Allan Villamor.
Ni Villamor ket ‘sole proprietor’ iti nadakamat a construction company a nairaman iti ghost flood control project idiay Malolos City, Bulacan.
Segun kenni Commissioner Mendoza, ti pannakaipila ti tax evasion complaint ket nagramot iti saanna a panagbayad iti buwis nga agdagup iti P48.39 million.
Kinunana a naikkan daytoy ti kontrata a mangibangon ti flood control project wenno river infrastructure protection idiay Bulacan idi 2024.
Innayon ti nasao a commissioner nga iti laksid ti pondo wenno bayad a naited iti kontraktor ket awan ti nakita a nalpas a proyekto.
Gaputa awan ti nakita a naaramid wenno ‘non-existent’ ti flood control project, kinunana a maibilang a ‘fictitious’ wenno parbo dagiti naideklara a gastos para iti pannakaibangon ti proyekto.
Gapu iti daytoy, impaganetget ni Mendoza a ti nasao nga addang ket mangipakita a seryoso ti kampanyada kontra korapsyon iti flood control projects.
