LA UNION – Naminsan manen a binigbig ken pinagyamanan ti Philippine Red Cross (PRC)-La Union Chapter iti Bombo Radyo La Union gaputi proyekto a Dugong Bombo: A little pain, a life to gain, a tinawen a proyekto ti Bombo Radyo Philippines iti intero a pagilian.
Iti naisayangkat nga Awarding and Recognition ceremony ti PRC iti provincial capitol ditoy syudad ti San Fernando idi kalman, Hulyo 23, inawat ti Bombo Radyo La Union iti Certificate of Recognition manipud kenni PRC director for national blood services Christie Monina Nalupta, a nagserbi a guest of honor and speaker.
Iti nasao a seremonya ket maysa kadagiti tampok a programa iti selebrasyon ti PRC a National Blood Donors Month ita a bulan ti Hulyo.
Binigbig ni PRC-La Union Chapter Administrator Almira Abrasado, iti blood letting program a Dugong Bombo, kas kadackelan a voluntary blood donor services iti intero a pagilian.
Kagiddan ti pammadayaw iti Bombo Radyo ken dadduma pay nga indibiduwal, grupo, district hospitals, dagiti eskuwelaan, barangay, institusyon, ken ahensiya ti gobyerno, impeksa ni Abrasado iti maminsan manen a panangsuporta iti Dugong Bombo inton November 2019 babaen iti panag-donar ti dara.
Iti tema ti National Blood Donors Month ti PRC ita a tawen ket Safe Blood for All: Donate Blood, Save Lives.
