LA UNION – Agtultuloy iti isaysayangkat nga imbestigasyon ti pulisya maipapan iti napasamak a pammaltog iti uneg ti bus kabayatan nga adda daytoy iti national highway idiay Barangay Taboc, ili ti San Juan, La Union.
Iti agdama ket saan pay nga ammo iti pakabigbigan ti biktima ken ti hitman.
Base iti impormasyon a nakalap ti Bombo Radyo iti nakaimatang ti krimen, maipagarup a nagpara ti suspek nga adda iti uneg ti bus kasaruno iti panangpaltogna iti ulo ti biktima a rason ti nakatayan daytoy.
Bimmaba ti gunman idiay batog ti Taboc Elementary School kasaruno iti panaglibasna a naglugan iti maysa a motosiklo.
Awan naaramidan ti driver ken dagiti amin a nakalugan iti bus a lapdan a makalibas ti nangpaltog gapu iti buteng.
Madama nga an-anupen iti pulisya dagiti suspek a naglibas. (Absalom Flores)
