LA UNION – Agpapaagas ita iti maysa a pribado nga ospital ti anak iti barangay chairman kalpasan a saeden isuda ti riding-in-tandem suspects iti kawatiwatan ti national highway idiay Barangay Cabaroan, ili ti Bacnotan, La Union itattay alas-12:00 ti aldaw.
Nabigbig ti 23-anyos a nasugatan a ni Perfecto Arniego Bucalbos Jr. a putot ni Punong Barangay Perfecto Bucalbos Sr. ti Barangay Callautit iti nadakamat nga ili.
Iti ekslusibo a pannakiuman ti Bombo Radyo iti saanen a nainaganan a nakaimatang ti krimen, kinunanana a kabayatan nga agmanmaneho ti motorsiklo ti ub-ubing a Bucalbos ken nakalubon ti amana ket killat ida a pinaltugan dagiti suspek.
Dagus met a naglibas dagiti dua a suspek nga agkalubbon iti maysa a motorsiklo kalpasan iti napasamak a krimen.
Sigun met kenni C/Ins. Reynaldo Soria, hepe ti Bacnotan Police Station, napuntaan ti bukot iti ub-ubing a Bucalbos, kabayatan a nagasat met ti kapitan iti barangay gapu ta saan daytoy a nasugatan gapu ti insidente.
Agtultuloy pay laeng ti imbestigasyon ti pulisya tapno maammuan ti motibo ken iti pakabigbigan dagiti suspek a naggandat iti biag dagiti agama. (Absalom Flores)
