BR LA UNION – Nangrugi ita nga aldaw ti Martes, Disyembre 23, 2025 naipasidong iti red alert status ti Bureau of Fire Protection iti intero a pagilian ken agpatingga daytoy agingga Enero 2, 2026 kalpasan ti selebrasyon ti Baro a Tawen.
Iti eksklusibo a pannakiuman ti Bombo Radyo La Union kenni Fire Inspector Roderick Moskito, mangidadaulo ti Bureau of Fire Protection idiay Luna, La Union imbinsa-binsa na dagiti rumbeng nga aramiden da ita a holiday season iti sidong ti code red.
Kaipapanan ti nasao nga status a kumpleto ken naka-standby dagiti personnel, suspendido ti panag-leave, malaksid nu sick leave ken siguradwen a nakasagana iti fire truck a rumesponde nu bilang adda tumpuar nga insidente ti uram.
Kabilang pay ditoy iti panangisayangkat da ti roving operations wenno panagrekorida ti bigat ken malem, fire truck visibility ken inspection kadagiti aglak-lako ti firecrackers and pyrotechnic devices.
Impannakkel ni Moskito a maibasar iti datus ti opisina, awan pay ti timpuar a firecracker related incident iti masakopan da a lugar, sipud idi napan a tawen agingga ita a bulan ti agdama a tawen.
Uppat a negosyante ti naikkan ti firecracker permit tapno makapag-lako da ti paputok idiay ili ti Luna.
Malaksid ti nasao a permit, requirement pay a nasken a maipaayan da ti fire safety inspection certificate ken naipasidong da iti seminar tapno ammo ti aramiden da nu ingkaso adda tumpuar nga insidente ti uram.
Iti sabali a bangir, impakaammo ni Moskito nga ituloy da ita a tawen ti narugyan a programa ti opisina da a anagibunong ti torotot para kadagiti ubbing, tapno isuro ken maipasagepsep kadakuada a nataltalged nga usaren ti torotot kumpara ti paputok.
