Imbasura ti Court of Appeals (CA) ti apela ni Cagayan Governor Manuel Mamba nga i-dismiss ti reklamo a libel nga impila ni Chief Presidential legal counsel Juan Ponce Enrile kontra kenkuana.
Babaen ti resolusyon a napetsaan ti Abril 21, ibagbaga ti appellate court a napaay dagiti petitioners nga isuda Mamba ken Rogelio Sending Junior a mangilatag kadagiti baro nga argumento tapno baliktaden ti desisyon iti korte idi Disyembre 6, 2024.
Gapo iti daitoy ket pinatibker pay ti korte ti resolusyon ti Makati Regional Trial Court Branch 137 a nangtagiawan ti apela ni Mamba tapno ibasura ti kaso.
Segun iti CA, dagiti argumento a naidatag ket inulit laeng dagiti isyu a naresolbaren iti resolution da. Maibasar ti allagaden, nasken nga ibasura ti maysa a motion for reconsideration nga awanan metten kadagiti baro wenno novel issues a naidatag.
Maipalagip a nagtaud ti reklamo kalpasan a maakusaran da Mamba ken Sending Junior ti panangi-ere ti malisyoso nga akusasyon kontra kenni Enrile iti maysa nga online radio program idi panawen ti pandemya, tawen 2020.
