Rinugianen ti Civil Aviation Authority ti Pilipinas (CAAP) ti imbestigasion iti nagsuwek a private plane idiay Maguindanao del Sur a nakatayan ti uppat a ganggannaet.
Maibasar iti CAAP statement, nangaramid da ti inisyal nga imbestigasion kabinnulig dagiti lokal nga autoridad tapno maikeddeng ti makagapu iti aksidente.
Limitado pay laeng ti impormasion ti CAAP iti insidente ngem pinasingkedan ti ahensia a mangipaulog da iti kanayonan nga impormasion, a mapakuyogan iti naun-uneg nga imbestigasion.
Kinompirmar ti US Indo-Pacific Command a ti nagsuwek a private plane idiay Maguindanao del Sur ket mangisaysayangkat kadagiti intelligence ken surveillance operations, kas sungbat iti immun-una a kiddaw ti gobierno ti Pilipinas.
Segun iti US Indo-Pacific Command, uppat a ganggannaet ti natay pakairamanan ti U.S. military service member ken tallo a defense contractors a paset amin ti opisial nga surveillance operation.
Segun iti nasao nga command, napasamak ti insidente bayat nga adda iti eroplano iti routine mission idiay Mindanao, kas paset ti US-Philippine security cooperation activities.
