Namnamaen ti Civil Aviation Authority of the Philippines (CAAP) nga umabot ti agingga 10% a panagado dagiti pasahero kadagiti airport ita a Semana Santa, iti laksid ti agtultuloy a panagngato ti presio ti petroleo iti sangalubongan a merkado.
Maibasar iti forecast ti ahensia, dumanon ti 550,000 a biahero iti dumalan kadagiti nadumaduma nga eropuerto ditoy pagilian para iti Lenten break.
Nangatngato daytoy a bilang no idilig iti 500,000 a pasahero a nairekord iti kapada a panawen idi napalabas a tawen.
Impaganetget ti CAAP a saan a lapped iti nangato a plete gapu ta kaaduan a biahero ket nakareserbadan ti flights sakbay a timpuar ti tension idiay Middle East a dakkel a nakaapekto iti suplay ti krudo.
Pinasingkedan daytoy ni CAAP public information officer Bea Bernardo.
Kas sungbat iti sitwasyon ken addang tapno mapalag-an iti dadagsen dagiti pasahero kasta met dagiti airlines iti kangitingitan ti agsasaruno a panagngato ti presio ti lana, immunan nga inwaragawag ti CAAP iti pannakakissay kadagiti singsingirenda nga aeronautical fees ken Passenger Service Charges (PSC).
Babaen ti nadakamat nga addang, naibaba ti aeronautical fees iti 50%, idinto a naikkan ti diskuwento a dumanon ti ₱5,000 dagiti landing charges.###
