Nangiruar ti palagip ti Civil Aviation Authority of the Philippines (CAAP) kadagiti amin a pasahero nga rumuar ti pagilian a pagtalinaeden nga imet ti pasaporte nangruna kadagiti check-in ken immigration process.
Kasaruno daitoy ti insidente iti saan a makasakay a pasahero ti Cebu Pacific nga agturong kuma idiay Bali, Indonesia gapo ta pisang iti pasaporte na.
Segun iti airline, saan a palpalubosan ti immigration authorities a makabiahe ti pasahero nga addaan ti dadael a dokumento isu a napilitan ida a saan a pasakayen daitoy.
Kinuna ni CAAP spokesperson Eric Apolonio a napateg a personal nga iggem ti tunggal pasahero dagiti pasaporte da ken kitaen a naimbag sakbay nga agturong iti airline wenno immigration officers. Binallaagan na pay nga iyalaan daitoy ti ladawan kas pammaneknek iti kondisyon ti dokumento.
Innayon pay ni Apolonio kadawyan kadagiti grupo a biyahero ti panagbalin nga iresponsable maipapan ti pasaporte a mabalin met a mangigubuay ti pannakadadael nu maliwayan.
Pinaglibakan na met dagiti damag mainaig ti iregularidad iti nagviral nga insidente ken impunto na nga adda met CCTVs kadagiti airline counter para iti transparency.
Pinaregta na pay iti publiko a dagos nga i-report iti airline ti aniaman a kapada nga insidente tapno maimbestigaran a naimbag.
Kabayatanna, impaganetget manen ti Cebu Pacific a trabaho ti airline a siguraduen a buo, usto, ken balido dagiti dokumento nga imet ti tunggal pasahero kas miyannurot metten iti allagaden ti immigration.
