Impadamag ti Civil Aviation Authority of the Philippines (CAAP) a temporario a restricted area ti paset ti Luneta Park idiay Manila ken Edsa Shrine idiay Quezon City kas panagsagana kadagiti planado a rally kontra korapsion a maisayangkat kadagiti nadumaduma a lugar ita nga aldaw, September 21, 2025.
Nagbalin nga epektibo iti advisory alas-6 itay agsapa nga agpaut agingana inton bigat iti kapada met laeng nga oras.
Maiparit dagiti amin a lugan pangtangatang, karaman dagiti drone wenno unmanned aerial vehicles (UAV) a maipatayab iti uneg ti 15 nautical mile radius manipud iti sentro dagitoy a lugar, manipud kadagaan agingana iti kangato a 10,000 ft.
Panggep daytoy nga addang a mapagtalinaed iti kinatalged dagiti tao iti kalsada ken maliklikan iti aniaman nga insidente a mabalin nga igubuay dagiti lugan pangtangatang iti panawen dagiti panagtitipon.###
