LA UNION – Namnamaen a sumango kenni President Ferdinand Marcos Jr. ni double olympic gold medalist Carlos Yulo ken dadduma pay a Filipino olympians idiay Malacanang inton Martes, August 13, 2024.
Sumangpet iti grupo ni Yulo inton malem ti Martes idiay Villamor Air Base ken sabaten ti bukodda a pamilya.
Segun iti Presidential Communications Office, maipaayan ti heroes parade dagiti atleta, mangrugi idiay PICC, Pasay City ken dumalyasat iti sumagmamano a lugar idiay Manila nga agturong idiay Malakanyang.
Idiay Malacanang, sabaten ni President Marcos, First Lady Liza Araneta Marcos ken First Family dagiti atleta ken maipaayan dagitoy ti pammadayaw ken insentibo para iti kontribusyon da iti Philippine sports ken nagbalin a performance iti 2024 Paris Olympics.
